Die Kerk onderskryf en onderhou die volgende geloofsbeginsels:
 Ons glo die Bybel as die geïnspireerde Woord van God, ewig en onfeilbaar en dat dit gesaghebbend die wil van God vir die mens verkondig en alles leer wat vir saligheid nodig is. 
(Ps. 119:160 Rom. 15:4; II Tim. 3:16).

Ons glo in die Enige Waaragtige God van die Bybel - Vader, Seun en Heilige Gees.
(Deut. 6:4;  Job 23:13;  Jes. 44:6;  Sag. 14:9;Mark 12:29;Joh. 17:3; Kol. 2:9;Jak. 2:19;  Openb. 4:2 & 8).

Ons glo in die maagdelike geboorte en Godheid van Jesus Christus die Here, Sy kruisdood, opstanding op die derde dag, hemelvaart en wederkoms.
(Lev. 23:1-44;  Jes. 7:14; Jes. 9:5;  Matt. 1:23; Matt. 12:38-40; Matt. 27:32-56;  Matt. 28:1-10;  Mark. 16:1-7;  Luk. 22:1-20;  Luk. 23:56; Joh. 19:31;
Hand. 1:9-11; I Kor. 15:1-3;  Gal. 4:4; Tit. 2:13)

(a) Ons glo in God die Vader, ewig, onsigbaar en alomteenwoordig. 
(Deut. 4:12;Joh. 1:18,Joh. 4:24;Joh. 5:37;  I Tim. 6:16).

(b) Ons glo in die eniggebore Seun van God, Jesus Christus, die Woord wat vlees geword het.  (Jes. 7:14;  Matt. 1:23;  Joh. 1:14; Joh. 3:16; Gal. 4:4; I Tim. 3:16;  Heb. 2:14;  I Joh. 5:20;  Openb. 1:18).

(c) Ons glo in die Heilige Gees wat die Gees van die Vader  en Christus is, wat die wêreld oortuig van sonde, geregtigheid en oordeel en die mens in die hele waarheid lei. 
(Joh. 14:16 & 17 & 26;  Joh. 15:26; Joh.16:7,8,13;  Rom 8:9, I Kor. 2:11;  II Kor. 3:17).

Ons glo dat alle mense hulle moet bekeer en weergebore moet word uit water en Gees en dat almal wat glo in die verlossingswerk van Jesus Christus, gedoop moet word tot vergifnis van hulle sonde deur enkelvoudige onder- dompeling in die Naam van die Here Jesus. 
(Matt. 28:19; Joh. 3:5; Hand. 2:38;  Hand. 19:1-6;  Rom. 6:1-4;  I Kor. 6:10-11;  Gal. 3:27;  Tit. 3:5; I Pet. 3:20 &21).

Ons glo in die uitstorting van, en doping met die Heilige Gees, waarvan die uiterlike teken die spreek in ander en nuwe tale is. Ons glo aan die genadegawes van die Heilige Gees, soos weergegee in die Woord van God, waarvolgens die kerk toegerus moet word vir dienswerk.
(Joël 2:28 & 29; Matt. 3:11; Mark. 16:17;  Hand. 2:1-4 & 38; Hand. 19:1-6;  Rom. 12:3-8;  I Kor. 14:2 I Kor. 12:1-31; Efes. 4:7-16;   I Pet. 4:10).

Ons glo dat die Kerk geroep is tot gehoorsaamheid aan die uitvoering van die Groot Gebod en die Groot Opdrag.
(Matt. 22:36-40;  Matt. 7:12; Matt. 28:19;  Mark. 16:15;  I Kor. 10:24).

Ons glo aan die opstanding van die dode tot die ewige lewe of die ewige verderf en in 'n oordeelsdag waar Jesus Christus die lewende en die dode sal oordeel en dat daar 'n nuwe hemel en 'n nuwe aarde gaan wees waar God in heerlikheid en geregtigheid sal regeer.
(Sag. 14:9; Matt. 24:40-41; Joh 5:28-29; 1 Kor. 15:42; 1 Thes. 4:13-17; 2 Pet 3:13; Openb. 20:11-15; Open. 21&22).

Ons glo aan die gereëlde bediening van, en deelname aan die Nagmaal wat 'n instelling is van Jesus Christus en deur die Kerk onderhou moet word.
(Matt. 26:26-29; I Kor. 10:14-22; I Kor. 11:23-33).
Ons glo aan heiligmaking deurdat elke Christen 'n dissipel van Jesus Christus moet wees en 'n toegewyde en heilige lewe moet lei volgens die  vrug van die Gees.
(Ef. 5:22; Matt. 5:48; 1 Kor. 6:19 & 20; Heb. 12:13-16; 1 Pet:14 -16).